Həyat dərsi
Bu gün bircə anlığa küsmüşdüm bu həyatdan
Çətinlikdən yorulub bezmişdim yaşamaqdan
Ümidsizlik içində göy dənizə baxırdım
Qəzəblənib özümə şimşək təki çaxırdım,.
Birdən sanki dalğalar dilə gəlib söylədi
“Söylə bu gözəl həyat axı sənə neylədi?
Sənin bu vəziyyətin inanki nankorluqdur
Həyatın gözəlliyin görməməkdə korluqdur
Bax dağlarda şəlalə necə gözəl çağlayır,
Gör nə möcüzədirki bulud sanki ağlayır.
Bax ətrafda nə varsa elə bilki sənətdir
Gördüklərin boş deyil canlı bir həqiqətdir.
Bəlkədə küsgünlüyə bəhanə axtarırsan
Gözəlliyi görnəyib,çirkinliyə baxırsan.
Bütün bu şahəsəri özün qazanmamısan,
Sənə bəxş olunubdur, sən özün almamısan.
Ancaq bununla belə haqsızlıq eyləyirsən
Heçnə ilə doymayıb yenədə istəyirsən,
Unutma qoca dünya heç kimsəyə qalmayıb
Bu həyatdan heç bir kəs indiyədək doymayıb.
Həyatında nə varsa sənin üçün sınaqdır,
Bu dünyada hər canlı keçicidir, qonaqdır.
Bu tərəfdə nə əksən , o tərəfdə biçərsən
Bircə gözəl düşünsən bu sınaqdan keçərsən.
Nəysə mən çox danışdım bəlkə gedəcək əbəs,
Ağıllı insanlara bir işarə edər bəs”
Beləcə pıçıldadı bir coşğun dalğa mənə
Həyat dərsi öyrətdi o dəli dalğa mənə.
